حكومتنا العظيمة
مش عارف لية الحكومة بقت ملطشة للناس و كل واحد بيزايد على التانى يقوم يشتم فى الحكومة طيب يأخى ماتورينا عبقريتك دى فى حاجة غير الشتيمة عايز تغير الحكومة غيارها حد منعك بس عمر الكلام ما غير حاجة بس واضح إن الحكومة عندها تقصير كبير فى التربية قبل التعليم و عشان كدة شفنا النماذج دى من الشباب هما صحيح قلة بس صوتها عالى يعنى يا فرحة الشباب بتوع الخليج لما يشوفوا كلامكوا دة مش هى دى مصر.
مصر طول عمرها رائدة وطول عمرها بتفتخر و تعتز بأولدها الأوفياء الحريصين على مصلحتها مش إلى جاين يمارسوا مراهقتهم على بلدهم ولا واحد عايز يعيش دور الإنسان الثورى يعد يوجة ويرشد كأنة يعنى هو إلى عاندة الحكمة الخالصة إلى مش موجودة عند غيرة.
إلى كل واحد عاوز يهاجر ويسيب البلد مع السلامة البلد مش ندمانة عليك وإذا كنت إنت مستغنى فية غيرك ألافات نفسهم يبقو مصريين ويلا مش هانطلبك بإلى إندفع فيك لكن بأة التنين إلى قعدين بياكلوا من خيرنا و يشتموا حكومتنا مش عايز أوسخ لسانى معاهم وأحسنلهم يحصلوا الأولانيين مش عاجباكوا البلد سيبوها فية ملاين غيركوا البلد عجباهم كدة حد مسك فيكوا.
بتفكرونى بالمزرعة بتعتنا كل الحمير لونها أبيض بس على كل 100 جحش بيتولد بيطلع واحد بنى ما أعرفش بييجى منيين يظهر إنها صفة متنحية عند الحمير المهم الجحش البنى دة بيبقى حاسس دايماً إن الحمير التانية فيها حاجة غلط وإن هو إلى صح وتلقية عمال يرفص فى الناس وينهق طول الليل وبيبقى عامل قلق المقصود إن إحنا أول ما بنلقى بلوة زى دى جيالنا بنبيعة فى أول سوق و بأى سعر.
من كام يوم كنت بتمشى على الكورنيش جنب ماسبيرو كدة المهم حبيت أروح كنتاكى ناكل على السريع لقيتلك شوية ناس أعدة بشكل غير حضارى وزحميين المكان مش عارف إية إلى جيبهم هنا(هو دة مكان مظاهرات ثم كل من جمع عشرين تالتين عيل يسميها مظاهرة مش عارف الناس دى هاتتعلم إمته) وفى وسطهم واحد كان بيفكرنى بالجحش البنى إلى كنت بكلمكوا علية و عمال ينهق على الحكومة وإلى فوق الحكومة كمان أنا الصراحة ماكنتش عارف أمسك نفسى إزاى.
لو كنت رئيس الحكومة كنت هاعمل فية زى ما بنعمل فى المزرعة عندنا بس واضح إن إحنا عندنا ناس فى الحكومة قلبهم كبير و بيكبروا و مبيهمهمش الكلام إلى مالوش لزمة .
ثم ال..... إلى كان بيتكلم دة يبقى ميين يعنى هو فاكر نفسة بيفهم أكتر من الحكومة بتاعتنا يا إبنى دول ناس دكاترة فى الجامعة و مش أى جامعة كمان دول دكترة فى جامعات برة إفهموا بأة مرة .مش كل الناس هى إلى غلط ممكن تكون إنت إلى غلط و زى بيكون ما بيقول
If everything is coming your way you're in the wrong lane!
و متتهزيش يا حكومة و إعملى إلى إنتى شيفاه صح من خلفك 69,999,000مصرى بيفهم ويالة قدرك إنك تستحملى بتوع أمريكا دول.ثم كدة النسبة أحسن فى المصريين لأنهم من سلالة نظيفة و نظيفة أوى كمان. أهو ألف من 70 مليون مش بطال أحسن بكتيير من 1 فى المية.
وبعد دة كلة زاعلانين من الحكومة مش الحكومة دى إلى علمتكو ووصلتلكو ا للنتو فية طب لو ما فيش جمعية شباب المسقبل حد كان هايعرف يستخدم الكمبيوتر ويعمل مدونة كمان مش تفتكروا الراجل إلى خيرة مغرأكوا و معيشكوا فى عز ما كنتوش تحلموا بية
على العموم الكلاب تنبح والقافلة تسير
و السلام ختام
